सहयोग गर्नुस

Aside

 

गाउँको आफ्नै ब्लग मार्फत विभिन्न समाचारहरू थाहा पार्इराख्नका लागि सहयोग गर्नुहोला। धन्यबाद।

Advertisements

अविश्रान्त राजनैतिक यात्री- भूपेन्द्रबहादुर थापा

जन्मः

बेनी नगरपालिका वार्ड नं. १ अन्तरगत पर्ने रत्नेचौर गाउँमा बि.सं. २०२४ वैशाख १६ मा सामान्य किसान परिवारमा उनको जन्म भएको हो । [१] सरल एवं इमान्दार राजनैतिक व्यक्तिका रूपमा परिचित थापाको बाल्यकाल सामान्य बालककै रूपमा बित्यो । [२] बुबा शेरबहादुर थापा एवं आमा केशरी कुमारी थापाका जेष्ठ पुत्रका रूपमा जन्मिएका थापाका एक दिदी र एक भाई छन ।[३]

शिक्षाः

गाउँकै स्थानीय भानु उ. मा. वि. मा कक्षा ८ सम्मको अध्ययन पूरा गरी माध्यमिक शिक्षाको लागि गाउँदेखि ७ किमिको दुरीमा रहेको बागलुङ बजारस्थित बिद्यामन्दिर माध्यमिक बिद्यालयबाट बि.सं. २०३९ मा द्वितिय श्रेणीमा प्रवेशिका परीक्षा उत्तीर्ण गरेका हुन । [४] प्रवेशिका परीक्षा उत्तीर्ण गरेपछि बागलुङ बजारकै धौलागिरि बहुमुखि क्याम्पसमा आइ एल सम्मको अध्ययन पूरा गरेका थापा त्यसपछि निरन्तर राजनीति मैं निरन्तर लागिपरेका छन । [५]

राजनैतिक जीवनः

बि.सं. २०५४ सालमा तत्कालिन जिल्ला बिकास समितिको उपसभापति पदमा अत्याधिक मतका साथ बिजय प्राप्त गरेपछि थापाले जिल्लाको राजनैतिक वृतमा उदीयमान राजनैतिक नेतृत्वका रूपमा पर्दापण गरे ।[६] पार्टी राजनीतिमा चाँहि उनको बलियो उपस्थिति बि.सं. २०६७ माघ ३ गते तत्कालिन धौलागिरि अञ्चलको नेकपा ‌‍(एमाले) को अञ्चल कमिटिका लागि भएको निर्वाचनमा सर्वाधिक मत ल्याउने उम्मेदवारको दोस्रो क्रममा निर्वाचित भएपछि भएको हो । त्यस्तो प्रकृतिको निर्वाचनमा अञ्चलभरका जिल्ला कमिटिका प्रमुखहरू, जिल्लाका राष्ट्रिय प्रतिनिधी परिषदमा प्रतिनिधित्व गर्ने सदस्यहरू र केन्द्रिय सदस्यहरूले मत खसाल्न पाउने व्यवस्था थियो । जुन निर्वाचनमा थापालाई १४ मतदाताहरू मध्ये १० जनाको मत प्राप्त भएको थियो ।[७]

बि.सं. २०४८ सालमा म्याग्दी बहुमुखि क्याम्पसको पहिलो स्ववियू निर्वाचनमा सदस्य पदमा निर्वाचित भएका थापाले त्यस यता पार्टीको सांगठनिक पदका लागि भएका कुनैपनि निर्वाचनमा पराजयको स्वाद चाख्नुपरेको छैन । [८] विद्यालयस्तरकै अध्ययन गर्ने क्रममा बि.सं. २०३८ सालमा अनेरास्ववियू (पाँचौं)को सदस्य भएर राजनीतिक यात्रा सुरु गरेका थापाले त्यहि बिन्दुबाट आफ्नो राजनैतिक यात्रा जारी राखे । उनी बि.सं. २०७१ साउन १ गते तत्कालिन नेकपा एमालेको बैकल्पिक केन्द्रिय सदस्यमा निर्वाचित भएका थिए । [९] [१०] बि. सं. २०४६ सालको जनआन्दोलनमा तत्कालिन रत्नेचौर गाउँको संयुक्त वाम मोर्चाको संयोजक भएर बहुदलको पक्षमा लडाईं लडेका उनले बि.सं. २०४७ सालमा नेकपा एमालेको सदस्यता ग्रहण गरे । लगत्तै रत्नेचौर गाउँ कमिटिको सचिवको भूमिका निर्वाह गरे। त्यसपछि बि.सं. २०४८ सालमा इलाका २ को सचिव, बि.सं. ०४९ मा क्षेत्रीय कमिटी १ को सदस्य निर्वाचित भए । त्यसको एक वर्षपछि उनी बि.सं. ०५० सालमा तत्कालिन नेकपा (एमाले) म्याग्दीको जिल्ला कमिटी सदस्य र इलाका नं. २ क्षेत्रको इन्चार्जको भूमिका निर्वाह गरे । [११][१२]

जिल्ला कमिटी सदस्यमा निर्वाचित भएको तीन बर्षपछि उनी २०५३ सालमा पार्टीको जिल्ला उपसचिवमा चयन भए । त्यसैगरी बि.सं. २०५५ सालमा तत्कालिन नेकपा (एमाले) को भातृसंगठन प्रजातान्त्रिक युवा संघ नेपालको केन्द्रीय सदस्य निर्वाचित भई, जिल्लाबाट मातृपार्टीको कुनैपनि भातृ संगठनको केन्द्रिय कमिटीमा पुग्ने पहिलो स्थानीय नेता हुन सफल भए । तत्कालिन बिद्रोही नेकपा (माओवादी)ले देशब्यापी रूपमा चर्काइरहेको जनयुद्वको समय विशेषतः बि.सं. २०६२ सालदेखि २०६६ सालसम्म तत्कालिन नेकपा एमालेको म्याग्दीको जिल्ला सचिवमा सर्वसहमतिले चयन भई अनवरत रूपमा पार्टीको सांगठनिक स्थितिलाई मजबुत गराउन लागि परे । जिल्ला कमिटी, म्याग्दीको प्रमुखका रूपमा उनले निभाएको भूमिका कै कारण अत्याधिक मत सहित बि.सं. २०६८ सालमा पार्टीको तत्कालिन धौलागिरि अञ्चल कमिटी सचिव पदमा निर्वाचित हुन सफल भए । बि.सं. २०७१ सालमा काठमाण्डौंमा आयोजित तत्कालिन नेकपा एमालेको नवौं महाधिवेशनबाट वैकल्पिक केन्द्रीय सदस्यमा भारी मतले निर्वाचित भएपछि उनी धौलागिरि सहसंयोजकमा चयन भए ।[१३][१४] [१५] देशका दुई ठूला कम्युनिष्ट पार्टी तत्कालिन नेकपा (एमाले) र नेकपा (माओवादी) मिलेर बनेको हालको नेपाल कम्युनिष्ट पार्टी (नेकपा) मा केन्द्रिय सदस्यमा पर्न सफल भूपेन्द्रबहादुर थापाले खुलेर कुनै पनि गुटलाई समर्थन नगरे पनि उनी पार्टी उपाध्यक्ष बामदेव गौतम नजिक भएको विभिन्न समाचार टिप्पणीमा आउने गरेको छ । [१६]

प्रतिनिधि सभा निर्वाचन एवं उम्मेदवारीः

बि.सं. २०७२ सालको संविधान जारी भएपछि भएको संघिय संसदको पहिलो निर्वाचनमा एक मात्र निर्वाचन क्षेत्र तोकिएको म्याग्दी जिल्लाबाट बामगठबन्धनको साझा उम्मेदवार चयनमा भएको रस्साकस्सीमा भूपेन्द्रबहादुर थापाले बाजी मार्न सफल भए ।[१७][१८][१९] पार्टी एकिकरण पूर्व दुई कम्युनिष्ट दल नेकपा एमाले र माओवादीले संयुक्त गठबन्धन बनाएर देशभरबाट निश्चित भागबण्डाका आधारमा एउटै चुनाव चिन्ह लिएर निर्वाचनमा भिडेका कारण कुन जिल्लाबाट संघिय संसदमा को र कुन पार्टीको ? त्यस्तै पहिलोपटक हुन लागेको प्रदेश सभामा कुन पार्टी र कसले उम्मेदवारी पाउने भनेर देशैभर विभिन्न अडकलबाजी चलेका बखत म्याग्दीबाट पनि कुन पार्टीको कसले संघिय संसदको उम्मेदवार हुन पाउने हो, यसै भन्न सकिने अवस्था थिएन । तर यो पार्टीले यो नेताले उम्मेदवारी प्राप्त गर्न सक्छ भनेर चिया गफ देखि चौतारीको जमघटसम्ममा छलफल भएकै थिए । यसै क्रममा संघिय संसदको उम्मेदवारी तत्कालिन एमालेको भागमा पर्नु र उम्मेदवारी भूपेन्द्रबहादुर थापाले पाउनु खासै अनेपेक्षित चै थिएन । [२०][२१] संघिय संसदको प्रतिनिधिसभा सदस्यमा आफ्ना निकटम प्रतिद्वन्द्वीलाई २ हजार भन्दा बढीको मतान्तरसहित कुल २३ हजार ३ सय ८ मत प्राप्त गरी बामगठबन्धनका तर्फबाट उम्मेदवार बनेका थापाले बिजय प्राप्त गरेका थिए ।[२२][२३]

Source: Wikipedia

अब रत्नेचौरमा पनि इन्टरनेट सेवा

रत्नेचाैरमा इन्टरनेट सेवा उपलब्ध हुने भएको छ । फोटोः गुगल इमेज

रत्नेचाैर, 

दुई जिल्ला सदरमुकामहरू (बेनी र बागलुङ) को बिचमा रहेर पनि अहिलेसम्म इन्टरनेट दुनियाँसँग जोडिन नसकेको रत्नेचौर अन्नततः इन्टरनेट सेवा प्राप्त गर्न सक्षम भएको छ ।

रत्नेचौरमा उपलब्ध भएको इन्टरनेट सेवा कुनै पनि राजनैतिक दल या निर्वाचित प्रतिनिधिको पहलमा नभै  रत्नेचौरका युवा व्यवसायी दानबहादुर महत (शंकर) को एकल प्रयास र इच्छाशक्तिका कारण सम्भब भएको हो । व्यवसायी महत विगत लामो समयदेखि गाउँमा इन्टरनेट सेवा भित्र्याउन अथक प्रयासमा तल्लिन हुनुहुन्थ्यो । तर वहाँको प्रस्तावको कुनै पनि इन्टरनेट प्रदायक संस्थाले सुनुवाइ गरेका थिएनन । तर हालै पोखरा इन्टरनेटले आफ्नो वायरलेस नेटवर्क सेवा सुलभ मूल्यमा उपलब्ध गराएपछि यो सम्भब भएको हो । हाल यस कम्पनीको १० एमबिएस गतिको इन्टरनेट सेवाका लागि अावश्यक इन्टरनेट साधन र राउटरसहित एकमुष्ठ १४ हजार र मासिक १ हजार २ सयको शुल्कमा यो सेवा लिन सकिनेछ । यहि मंसिर १९ गतेदेखि सेवा लिएपछि महतले सामाजिक संजाल फेसबुकमा खुशि ब्यक्त गर्नुभएको थियो । वहाँसँगै अन्य ४ जनाले पनि यस सेवा लिन थालेको र ५० भन्दा बढी सेवाग्राही भएपछि कम्पनीले फाइबरबाटै इन्टरनेट सेवा उपलब्ध गराउने र फाइबरबाट उपलब्ध हुने इन्टरनेट सेवा अझ भरपर्दो र तिब्र गतिको हुने कम्पनीका प्रतिनिधीको दाबी रहेको महतले बताउनुभयो । साथै, फाइबरबाट इन्टरनेट सेवा वायरलेस प्रविधिको सेवाभन्दा सस्तो र सुलभ हुने पनि महतको भनाई छ । 

मनकारीकाे बाटो हेर्दै साइँली

बेनपा १ रत्नेचौर

साबिकको रत्नेचौर गा.वि.स २, सालघारीकी साईली भनेर चिनिनु हुने पार्वती किसान केहि महिना अगाडि आन्द्राको क्यान्सरबाट थलिनुभएको थियो । क्यान्सरको सफलतापूर्वक निदान गरिएपछि वहाँ केहि तन्ग्रिदै हुनुहुन्थ्यो । तर अचानक खुट्टामा समस्या परेकाले अस्पतालमा भर्ना हुनुभएको छ ।बायाँ खुट्टामा नशासम्बन्धी (Deep vein thrombosis) जटिल समस्याले ग्रसित किसानको हाल पश्चिमाञ्चल क्षेत्रीय अस्पताल रामघाट पोखरामा उपचार भैरहेको छ ।

अस्पतालमा भर्ना अवस्थामा विरामी पार्वती किसान

क्यान्सरको उपचारका क्रममा ठूलो आर्थिक भार बेहोर्नु परेकाले यस परिवारले थप आर्थिक स्रोत जुटाउन नसकेकाले निजको परिवार गम्भिर समस्यामा परेको वहाँका छोरा विदुर किसानले बताउनुभयो । थप उपचारका लागि चार पाँच लाख रकम जुटाउन सके अस्पतालमा बिरामी कुर्ने खर्च जेनतेन आफूहरूले ब्यबस्था गर्न सक्ने जेठो छोरा कृष्ण किसानले बताउनुभयो । केहि महिना पहिला वैदेशिक रोजगारमा युएईमा कार्यरत रहेकै अवस्थामा आमाको उपचारका लागि बिचमै घर फर्किनुपरेको र त्यतिबेला पनि खर्च अभावका कारण हवाईटिकट बापतको खर्च एकै वार्डका निवासी शुभचिन्तक निराजन थापाले फिनल्याण्डबाट ब्यबस्था गरिदिएकाले सजिलो भएको वहाँले बताउनुभयो । यसर्थ: वैदेशिक रोजगारीका शिलशिलामा दुवैजना भाईहरू केहि महिनादेखि युएई रहेर फर्केको भएपनि कमाई खासै नभएको र भएको अलिअलि रकम पनि आमाकै उपचारमा खर्च हुँदै आएकाले आफूहरूलाई मनकारी सहयोगदाताहरूको सहयोग आवश्यक रहेको दुबै भाईको कथन छ ।

वहाँहरूकी ममतामयी आमाको शिघ्र स्वास्थ्यलाभको कामना गर्दै वहाँहरूलाई सहयोग गर्न चाहनेहरूका लागि निम्न बमोजिमको सम्पर्क नम्बरहरूमा सिaधा सम्पर्कका लागि अनुरोध छ ।बिदुर किसान – ९८४७६५१८२७कृष्ण किसान – ९८४७७५२१७८

जागरणले राख्यो चमच्चा

पिङ्मा रमाउँदै बालबालिकाहरू तस्बीरः मन्नु रावल

रत्नेचौर जागरण समूहले रत्नेचौरमा दोस्रो पटक चमच्चा र पिङ राख्ने काम सम्पन्न गरेको छ । जागरण समूहका शुभचिन्तक एवं आजिवन सदस्य श्री कृष्ण बोगटी (हालः मलेशिया) को विशेष आर्थिक सहयोगमा यो कार्यक्रम सम्पन्न गरिएको समूहका उपाध्यक्ष श्री मन्नु रावलले बताएका छन । रत्नेचौर डट कमसँगको विशेष संवादमा उपाध्यक्ष रावलले पिङ् अनि चमच्चा(रोटेपिङ), नराखेसम्म गाउँमा दशैं नै आएको जस्तो नहुनेभएकाले नीजि कार्यब्यस्तताका बाबजुद पनि जागरण समूहका सम्पूर्ण सदस्यहरू बिहानैदेखि काममा खटिएकाले यो सम्भव भएको बताए । समूहले चमच्चा राख्ने कार्यका लागि दुई जना अनुभवप्राप्त मिस्त्रीलाई विशेष ज्याला रकम दिएर सहयोग लिएको समूहका सक्रिय सदस्य हरिबहादुर महत (ध्रुब) ले जानकारी दिए ।

सरोज संगमको मुक्तक संग्रह विमोचित

saroj

This slideshow requires JavaScript.

रत्नेचौरका नवोदित साहित्यकार सरोज रावल संगमको प्रथम साहित्यिक कृति गाथा मुक्तक संग्रहको हिजो बैशाख ८ गते एक कार्यक्रमबिच बिमोचन गरिएको छ । धौलागिरी कला तथा साहित्य मञ्च बागलुङ्गको आयोजनामा कृतिको बिमोचन सर्जककी ममतामयी आमा देवी रावल, साहित्यकार भूपिन, र रत्नश्रेष्ठ पुरस्कार गुठीका अध्यक्ष प्रेम छोटाले संयुक्त रूपमा गरेका हुन । मुक्तक संग्रहको मूल्य रू. १०० राखिएको छ ।

जवाफ दिनुस मोबाइलमा पैसा भर्नुस

उपलब्ध विकल्प मध्य सहि विकल्प छनोट गरी सम्प्रेषण गरी ने.रू ५०० बराबरको मोबाइल रिचार्ज जित्नुस । शर्तहरू लागू हुनेछ ।

१) यस स्पर्धामा भाग लिन बेनपा १, रत्नेचौरको स्थायी बासिन्दा हुनुपर्नेछ ।

२) जवाफ दिने अन्तिम मिति २०७४ चैत्र १० गते ।

 

यी युवाहरू जसले सम्भब गराए ऐतिहासिक फुटबल प्रतियोगिता

“रत्नेचौरमा यस अगाडि यत्तिको भब्य फुटबल प्रतियोगिता यस अगाडि कहिल्यै भएको थिएन ।”  प्रथम जागरण कपको अन्तिम स्पर्धा हेर्न बुढोचौरमा ओर्लनु भएका जेष्ठ नागरिक एवं प्रथम पुरस्कार राशी ५१ हजार १ सय ५१ नेरू प्रायोजन गर्नुहुने क्षेत्रबहादुर कार्कीका पिता गणेशबहादुर कार्कीले बताउनुभयो । कार्कीलाई जस्तै समग्र गाउँलेहरूलाई जीवनमा पहिलो पटक यो भव्य प्रतियोगिता आफ्नै गाउँ ठाउँमा हेर्ने अवसर प्राप्त भयो । स्वदेश विदेशमा रहेका गाउँलेहरू एवं छिमेकका गाउँले साथीभाईहरूले समेत खुल्ला हृदयले आर्थिक, भौतिक एवं नैतिक सहयोग गरेका कारणले नै यस्तो प्रतियोगिता सम्भव भएको हो । तर प्रथम जागरण कपलाई सभ्य एवं भब्य रूपमा सफल पार्न खास मेहनत गर्ने नायकहरूका बारेमा थोरै चर्चा गरौ‌ं ।

१. सुजन थापा

खेल संयोजकको भूमिकाको साथसाथै प्रतियोगितामा आवश्यक आर्थिक सहयोगको जोहो गर्न थापाले हदैसम्मको प्रयास गरे । उनले विशेषतः विदेशमा रहेका गाउँले दाजुभाईहरूलाई मात्र नभै अन्य जिल्लाका आफ्ना सहपाठी एवं साथीहरूबाट समेत उल्लेख्य रूपमा सहयोग उठाउन सफल रहे । प्रतियोगितामा वितरण एवं प्रयोग भएका ट्रफि, मेडल, प्रमाणपत्र, मायाको चिनो तयार पार्ने काममा समेत उनको उल्लेख्य भूमिका रह्यो । साथै उनले खेल संचालनको लागि आवश्यक रेफ्रि (खेल संचालक) हरूको व्यवस्थापन गर्नमा विशेष भूमिका खेले ।

२. ध्रुब महत

मञ्च ब्यवस्थापनदेखि देशविदेशमा रहेका गाउँले दाजुभाईहरूबाट यथेष्ट आर्थिक सहयोग जुटाउने कार्यमा महतको विशेष सक्रियता रह्यो । समूहका स्वंयसेवकहरूलाई खेल अवधीभर परिचालन गर्नका लागि उनले खास योगदान दिए । ट्रफि, मेडल, प्रमाणपत्र, मायाको चिनो एवं आपतकालिन रूपमा आवश्यक पर्ने विभिन्न सामाग्रीहरूको व्यवस्थापन एवं ढुवानी गर्नमा उनले महत्वपूर्ण भूमिका निर्वाह गरे । खेलको प्रचार प्रसारमा समूहका अन्य सदस्यहरू जस्तै यीनको पनि विशेष भूमिका रह्यो।

३. दानबहादुर महत (शंकर)

महा नायक राजेश हमाल अभिनित चलचित्र देउतामा उनले बोल्ने एउटा प्रचलित संवाद छ, “हे मान्छे हुँ, मान्छे । तर तँ जस्तो असुरको लागि शंकर, शंकर हुँ । नरपिचासको लागि नरसिंह …. शंकर हो मेरो नाम शंकर ।” ठ्याक्कै यहि संवादलाई सम्झाउने गरी विभिन्न कृयाकलापमा शंकर महतको सक्रियता रहने गर्दछ । रत्नेचौर जागरण समूहका सचिव समेत रहेका महतले कार्यक्रममा उदघोषण गर्ने देखि प्रथम पुरूस्कार लगायत केहि अन्य पुरस्कार प्रायोजनका लागि अहम् भूमिका निर्वाह गरे । कार्यक्रम अवधीभरको हिसाबकिताब दुरूस्त राख्नेदेखि समूहका सदस्यहरूमा वित्तिय अनुशासन कायम गर्न गराउन ठोस योगदान दिए ।

४. मन्नु रावल

बेलाबेलामा खेलको विचमा रमाइलो उद्घोषणमा मात्र नभै रावलले विशेषतः देशभित्रै रहेका शुभचिन्तक एवं गाउँलेहरूबाट महत्वपूर्ण आर्थिक सहयोग जुटाउन भूमिका निभाए । यसको अलावा मञ्चको सुरक्षा एवं व्यवस्थापन साथै स्वंयसेवकहरूको परिचालनमा रावलले अविष्मरणीय भूमिका निर्वाह गरेका थिए । प्रतियोगितामा सहभागी समूह र आयोजकबीच समन्वय एवं सहकार्यमा उनले जिम्मेवारीपूर्वक आफ्नो भूमिका निर्वाह गरे ।

५. समूहका अध्यक्ष गणेश बोगटी एवं सल्लाहकार अमर बोगटीले महत्वूर्ण अभिभावकीय एवं मार्ग निर्देशकको अहम् भूमिका निर्वाह गरे । हरि बोगटी एवं बिजु कार्कीले स्वंयसेवक व्यवस्थापन एवं परिचालनमा यथेष्ट भूमिका निर्वाह गरे । साथै अर्जुन महत, सागर रावल, मुकेश थापा, रमेश बोगटीले खेल अवधिभर प्राविधिक रेफ्रिको भूमिका निर्वाह गरे ।