एकैदिनमा दुईको मृत्यु !

आज एकैदिन बैशाख २९ गते हाम्रो गाउँमा २ जना बयोबृद्धको देहावसान भएको छ । आज बिहानै करिब ४ बजे रत्नेचौर–३, निवासी ८७ वर्षीय वयोवृद्ध भैरबबहादुर बोगटीको मृत्यु भएको हो । २ छोरा र ४ छोरीका पिता स्वः बोगटी गाउँमा धेरै वर्ष बाँच्नेहरु मध्ये एक हुनुहुन्थ्यो । स्वः बोगटी भारतीय सेनाको रिटायर्ड सुवेदार समेत हुनुहुन्थ्यो । रत्नेचौरका बोगटीहरूको लागि एक जिम्मेवार अभिभावकको भूमिका खेल्दै आउनुभएका बोगटीको निधनले विशेषत ः बोगटी बन्धु सेवा समाजले आफ्नो एक जिम्मेवार संरक्षक गुमाएको छ ।

त्यसै गरी रक्सीका पारखीहरु माझ मीठो रक्सी बनाउनमा प्रख्यात रत्नेचौर १ निवासी ७६ वर्षीया बसन्धरी थापाको दिउँसो २ बजे निधन भएको छ । पछिल्लो समय उहाँ श्वासप्रश्वास सम्बन्धी रोगबाट आक्रान्त हुनुहुन्थ्यो । रक्सी उत्पादन गरी व्यावसायिक जीवन निर्वाह गर्दै आउनुभएको उहाँको निधनले कम्तीमा पनि उहाँले उत्पादन गरेको मीठो रक्सीको स्वाद लिएकाहरूले जीवनमा सायदै दोहोर्‍याएर अब यस्तो मौका पाउने छन् ।

अर्जममा मोटरसाईकल दुर्घटना

 

दुर्घटनाग्रस्त मोटरसाइकल

 भकिम्ली ग्रामिण सडकखण्डको स्तरोन्नती नहुँदा यस भेगका बासिन्दाहरु जोखिमपूर्ण यात्रा गर्न वाध्य भएका छन् । अफ्ठेरो सडक तथा यस सडकखण्डमा गुड्ने सवारी साधनहरुले क्षमताभन्दा बढी यात्रु चढाउने कार्यले गर्दा दुर्घटनाको जोखिम पनि बढ्दै गएको छ । यसै बिचमा गत चैत्र १९ गते साँझ यस सडक खण्डको रत्नेचौर – ६ अर्जम स्थित रामचन्द्र नि.मा.वि. भन्दा ५० मिटर माथिको सडकबाट म्याग्दी कालि संचार सहकारीको ग ३ प ४१०८ को मोटरसाईकल सडकबाट झण्डै १०० मिटर तल गणेश मन्दिरमा झर्दा त्यसमा सवार उक्त संस्थाका प्राविधिक विजय गुरुङ गम्भिर घाईते भएका छन् । अफ्ठेरो बाटो र उच्च गतिका कारण दुर्घटना भएको घटनाका प्रत्यक्षदर्शी अर्जमवासीले बताए । उक्त दुर्घटना गाउँको बिचमा नभै कुनै निर्जन ठाउँमा भएको भए घाईते गुरुङको घटनास्थलमै मृत्यु हुन सक्ने प्रत्यक्षदर्शीले आशंका व्यक्त गरे । गाउँको बिचमा दुर्घटना भएकाले तत्काल उपचारका लागि धौलागिरि अञ्चल अस्पताल बागलुङ् पुर्‍याई प्राथमिक उपचार पश्चात पोखरा स्थित मणिपाल हस्पिटलको सघन उपचार कक्षमा दुई दिनको उपचार पछि निजको होश खुलेको बताईएको छ ।

रातो घेरामा मोटरसाइकल खसेको स्थान, पहेंलो धर्को मोटरसाइकल झर्दाको सम्भावित क्षेत्र