पूर्ब मनसुन अर्थात प्रि मनसुन निर्धारित समयमै अर्थात जेष्ठ २८ गते शुरू भएर दुई हप्तासम्म चले पनि मनसुनी वर्षामा नियमितता नभए पछि किसानहरू मर्कामा परेका छन् । केहि वर्ष अगाडिसम्म रत्नेचौर तथा यसका आसपासका छिमेकी गाउँहरू धाईरिङ, मालिका, कुडुँले र गौश्वारामा आषाढ अन्त्यसम्ममा करिब ७० प्रतिशत खेतहरूमा धान रोपिसक्ने गरिन्थ्यो । तर दुई चार वर्ष यतादेखि ठिक–ठिक समयमा खेतीबालिका कामहरू गर्न नसकिएको अनुभव सुनाउनुहुन्छ रत्नेचौर–१ का गोविन्द बोगटी ।

यसपाला मकैमा केहि ढिलो गरी घोगा लागेको र अझै कतिपय खेतहरूमा घोगा लाग्न भर्खर शुरू गरेकाले समेत धान रोप्ने काममा केहि ढिला भएको अनुभव छ, लामगराका युवा कृषक महेन्द्र बोगटीको । रत्नेचौर वार्ड नं. २ स्थित लामाचौर (लाचौर) का मकै नलगाइएका खेतहरूमा भने धान रोप्ने काम फटाफट भएको छ । त्यसैगरी खोलाका छेउछाउका खेतहरूमा पनि धान रोप्ने काम पूरै सकिएको छ । तर रत्नेचौरको मुख्य फाँट मानिने गाउँको बीचको फाँटमा भने धान रोप्ने काम १० प्रतिशत पनि सकिएको छैन् ।

सुन्तला फूल खेल्दै आयो अब त बरिख लाईगयो

बारीमा कोदो रोप्ने काम भने लगभग अन्तिम चरणमा पुगेको छ । तथापि कोदोको बिऊ आवश्यकता अनुरुप उत्पादन हुन नसकेकाले कोदो रोप्ने काम भने केहि प्रभावित भएको छ । कतिपय कृषकहरूले बिऊको अभावमा बारीमा मास तथा स्यालटुङको गेडा छर्न बाध्य भएका छन् ।